زين العابدين حوّاص، الملقب بولد الفلاّح، 422 سنة، بّاه هو الجيلالي حوّاص اللي كان رئيس جماعة ولاد حريز و الأم ديالو هي الزوجة الثانية ديال بّاه.
الخدمة ديالو باش كان كيعيش هي وسيط لبيع البطاطا فلاكريي.
ف 1997 غا يدخل لأول مرّة للإنتخابات الجماعية و غا يفوز بعضو المجلس فدائرة جوالة الرمل.
ف 2003 غا يخسر الإنتخابات على رئاسة جماعة الساحل.
ف 20099 حدّ السوالم غا تولّي بلدية، و غا يجمع ليهم حبّ و تبن، رئاسة البلدية و برلماني عن إقليم برشيد مع حزب الأصالة و المعاصرة.
قبل الإنتخابات الجماعية ديال 2015، غا تجي لجنة من المفتشية العامة للإدارة الترابية و غا تلقا بأن السيّد مروّنها مزيان فحدّ السوالم، عاطي رخص لشركات و ساني على عقود بيع أراض وضعيتها القانوينة مازال ما تسوّاتش، الضرائب ديال الجماعة ما تخلّصش فيها، لقاوه دار يدّو مع شركات العقار و طالق ليهم اللعب مقابل رشاوى و هدايا تحت الطبلة.
من بعد هاد الفضيحة، جرّا عليه حزب البّام، و تطرد من رئاسة بلدية حدّ السوالم.
ف 2016 فالإنتخابات البرلمانية ديال أكتوبر، غا يرجع زين العابدين عاوتاني للسياسة عوض ما يتحاكم و يتعتقل، و ترشحّ للإنتخابات هو و مراتو كاع، كوكيل للائحة حزب الإستقلال و هي وكيلة اللائحة النسائية.
تقب ليهم الورقة و ربح بأرقام غير مسبوقة (15 مقعد جماعي من أصل 29) و إستطع يهزم جهابدة إقليم برشيد رغم الشوهة اللي وقعات ليه العام اللي قبل، و هكذا غا يولّي عاوتاني برلماني و رئيس بلدية حدّ السوالم من جديد و حصّاد كيتفرّج.
زين العابدين هو اللي عندو فيديو شهير فاليوتيوب كيقول فيه للحاجة خديجة اللي جات عندو بغات شهادة إدارية، سيري و لا نطحن مّوك .
فشهر أبريل اللي فات محكمة النفض غا تحكم بتأييد الحكم القديم و غا تعاود تجرّي عليه من رئاسة بلدية حدّ السوالم رغم أنه ما خلاّ ما دار و إستعمل السلطة و لفلوس اللي عندو باش يبقى فداك المنصب.
زين العابدين هزّ عائلتو و قصد المطار فرمضان اللي فات باش يمشي يدير عمرة، لكن وقفوه و منعوه من السفر، حتا إستدعاتو الفرقة الوطنية نهار 20 فهاد الشهر بسبب أزيد من 150 شكاية ضدّو، و قرّّرات تحيلو على النيابة العامة لدى محكمة الإستئناف فكازا اللّي قرّّرات توضعو رهن الإعتقال فسجن عكاشة.
زين العابدين فاش قلّب البوليس دارو، لقاو عندو 17 مليار من فئة 200 درهم، يعني 17 مليار .
أول مقال بالدارجة المغربية على موقع مابريس – هشام كرم